Thaer geflymed wearth
North-manna brego,
Nýde gebaeded

Tó lides stefne

Litle weorode,

Creád-cnearr on flót;

70 Cyning út-gewát,

On fealne flód,
Feorh generede.

Swylce thaer eác se fróda

Mid fleáme cóm

On his cyththe north,

Constantínus.

Hár hilde-rinc

Hreáman ne thorfte,
Maegan gemanian.
80 He waes his maega
Sceáred, freónda,

Gefylled on folc-stéde,
Beslagen aet saecce,
And his sunu forlet
On wael-stowe,

Wúndum forgrundenne,
Geongne aet guthe.

Gylpan ne thorfte

Bearn blonden-feax

90 Bill-geslíhtes,

Eald in witte,

Ne Anláf thý má,
Mid heora here-láfum;

Hlihhan ne thorfton

Thaet híe beadu-weorca
Beteran wurdon

On camp-stéde,
Cumbol-gehnaestes,

Gár-mittunge,

100 Gumena gemótes,

Waepen-gewrixles,

Thaes-the hie on wael-felda

With Eadweardes

Eaforan plegodon.

Gewiton him thá North-menn

Naegled-cnearrum,

Dreórig-darotha láf,

On dynne mére,

Ofer deop-waeter,

110 Difelim secan,
Eft heora land,
Aewisc-móde.

Swylce thá gebróthru
Bégen aet-somne,

Cyning and Aetheling,

Cyththe sóhton,

West-Seaxna-land,

Wiges hreámige;

Laeton him behindan

120 Hraefn brýttian,

Salowig-padan,

And thone sweartan hraefn,

Hyrned-nebban,

And thone haswe-padan eárn,

Aeftan hwatne

Aeses brucan,

Graedigne guth-hafoc,

And thaet graege deór,

Wulf on walde;

130 Ne wearth wael máre

On thissum íglande

Aefre gyta
Folces gefylled,

Beforan thissum,

Sweordes ecgum,

Thaes the us secgath béc,
Ealde uth-witan,
Syththan eástan hider
Engle and Seaxe
140 Up-becómon,

Ofer brád-brymas
Brytene sóhton,
Wlance wig-smithas,
Wealas ofer-cómon,
Eorlas ár-hwate,
Eard begeaton.

XXVIII. THE DEATH OF EDGAR,

AND SUCCESSION OF EDWARD.

Hér ge-endode

Eorthan dreámas

Eádgár, Engla Cyning;

Ceás him other leoht,
Wlitig and wynsum,
And this wáce forlet.
Líf thás laene nemnath
Leóda bearn,

Menn on moldan.

10 Thone monath gehwaer

In thisse ethel-tyrf,
Thá-the aer waeron

On rím-craefte

Rihte getogene,

Julius namath,

Thaet se anga gewát,

On thone eahtateothan daeg,
Eádgár of life,

Beorna beáh-gyfa.

20 And feng his bearn

Syththan tó cyne-ríce,

Cild unweaxen,

Eorla ealdor,

Thám waes Eadweard nama.
And him tírfaest haeleth,

Tyn nihtum aer,

Of Brytene gewát,
Biscop se góda

Thurh gecynde craeft,

30 Thám waes Cyneweard nama.

Thá waes on Myrce,

On míne gefraege,

Wide and wel-hwaer,
Waldendes lóf

Afylled on foldan.

Feala wearth to-drefed
Gleáwra Godes theowa.

Thaet waes gnornung micel
Tham the on breostum

40 Waeg byrnende lufan
Metodes, on móde.

Thá waes maertha Fruma

Tó swithe forsawen,

Sigora Waldend,

Rodera Raedend,

Thá man his riht to-braec.

And tha wearth eác adrefed

Deór-mód haeleth,

Oslac of earde,
50 Ofer ytha gewealc,
Ofer ganotes baeth,
Gamol-feax haeleth,
Wis and word-snotor,
Ofer waetera gethring,
Ofer hwaeles ethel,
Háma bereáfod.

And tha wearth aet-ýwed,
Uppe on roderum,

Steorra on stathole,

60 Thone stith-ferhthe,
Haeleth hige-gleáwe
Hátath wide

Cometa bé naman,
Craeft-gleáwe menn,
Wise sóth-boran.

Waes geond wer-theóda
Waldendes wracu

Wide gefraege,

Hungor ofer hrusan.

70 Thaet eft heofona Weard gebette, Brego engla geáf

Eft blisse gehwám íg-búendra,
Thurh eorthan westm.